Սիրելի՛ բարեկամներ, առաջին անգամ իմ գրական, բնապահպանական բլոգ-կայքի և Ֆեյսբուքի միջոցով անց է կացվում Բնությանը նվիրված բացառիկ գրական մրցույթ: Ձեզ տրված է եզակի և շահավետ հնարավորություն, առանց մեծ ջանքերի գործադրման, Ձեր գրական տաղանդով նպաստելու բնապահպանությանն ու բնաճանաչողության մակարդակի բարձրացմանը, իսկ մրցույթում հաղթելու դեպքում՝ նվեր ստանալու Բնությանը վերաբերող բացառիկ գրքեր և հուշանվերներ: Քայլ արեք հանուն Բնության՝ Ձեր լուման ներդնելով Մարդ-Բնություն կենսական, կարևոր ու փխրուն կապի ամրապնդման և ներդաշնակեցման գործում:
ՄՐՑՈՒՅԹԻ ՄԱՍԻՆ
«Հանուն Բնության» գրական, բնապահպանական մրցույթն իմ հեղինակային մտահղացումն է: Ես մշակել եմ այս մրցույթի ծրագիրը՝ ցանկանալով բնապահպանության գաղափարի շուրջն համախմբել Բնություն սիրող և ստեղծագործող Մարդկանց և, գրականության միջոցով, օգտավետ քայլ անել Բնություն-Ստեղծագործ միտք ներդաշնակ կապի զարգացման ուղղությամբ՝ ի փառավորումն Բնության և ստեղծագործ Մարդու գրական տաղանդի:
Այսպիսով, «Հանուն Բնության» գրական մրցույթը՝ որպես գրագետ մրցակցություն, կրում է միայն գրական, բնապահպանական և բնաճանաչողական նպատակներ: Մրցույթը չի հետապնդում կոմերցիոն որևէ նպատակ, այն սոցիալական ցանցի օգտատերների շրջանում նյութերի պարզունակ լայքահավաք չէ, ոչ էլ՝ վաճառքի նպատակով իրականացվող գրքերի գովազդ, քանի որ մրցույթի հաղթողների համար որպես պարգևատրում նախատեսված իմ հեղինակային բնապահպանական որևէ գիրք չի վաճառվում շուկայում, դրանց վաճառքն արգելված է. Բնությանը նվիրված գրքերս Ընթերցողներին տրվում են միայն որպես նվեր:
Հատկանշական է, որ այս գրական մրցույթը բացառիկ հնարավորություն է ցանկացած բնասեր հայ հեղինակի համար՝ ոչ միայն նպաստելու բնապահպանական ու բնաճանաչողական նյութերի և Բնության նկատմամբ սիրո ու գորովանքի տարածմանը, այլև ինքնաարտահայտման ուրույն միջոց է՝ Բնությանը սեփական, յուրօրինակ ստեղծագործությունը ձոնելու և դրանով իսկ հանրությանը ներկայանալու համար: Այսպիսով, մրցույթի միջոցով հնարավորություն է ստեղծվում ավելի սերտացնելու Գրող-Ընթերցող կապը, ծավալելու ավելի սերտ և ուրույն ստեղծագործական համագործակցություն:
ՓՈՒԼ 1. ԻՆՉՊԵ՞Ս ՄԱՍՆԱԿՑԵԼ ՄՐՑՈՒՅԹԻՆ
«Հանուն Բնության» գրական մրցույթը մեկնարկում է 2017 թ. սեպտեմբերի 1-ին (Գիտելիքի օրը)` սույն հրապարակմամբ:
Մրցույթին մասնակցելու կարգը հետևյալն է.
1) Սույն գրական բլոգ-կայքից Ձեր ճաշակով ընտրեք բնապահպանական որևէ նյութ կամ Բնության թեմայով իմ որևէ բանաստեղծություն:
2) Այնուհետև ընտրված բնապահպանական նյութի կամ բանաստեղծության հղումով կիսվեք Ձեր ֆեյսբուքյան էջում՝ ստատուսի դաշտում տեղադրելով Բնությանը վերաբերող արդեն Ձե՛ր սեփական գրական հայատառ ստեղծագործությունը՝ չափածո (բանաստեղծություն) կամ արձակ (կարճ շարադրություն. գրական էտյուդ, առավելագույնը՝ մեկ էջի սահմաններում):
Խնդրում եմ նկատի ունենալ, որ ոչ հայատառ, ուղղագրական սխալներով և տեխնիկական կոպիտ վրիպակներով ստեղծագործությունները չեն ընդունվելու մրցույթին: Բացի այդ, անկախ նրանից Ձեր աշխատանքը չափածո է, թե արձակ, այն անհրաժեշտ է պարտադիր կերպով վերնագրել՝ մրցույթի եզրափակիչ փուլի ցուցակագրման համար:
3) Որպեսզի ես ստանամ Ֆեյսբուքում Ձեր ստեղծագործության մասին տեղեկացումը՝ Ձեր գրառման վերջում պարտադիր կերպով «Tag» արեք իմ Ֆեյսբուքի էջին, ինչպես նաև ավելացրեք հետևյալ հաշթեգը՝ #ՀանունԲնության
ՈՒՇԱԴՐՈՒԹՅՈՒՆ. Մրցույթին մասնակցելու հայտերի ընդունման վերջնաժամկետը՝ սեպտեմբերի 24-ն է, ժամը՝ 00:00: Այդ պահից սկսած նոր գործեր չեն ընդունվելու:
ՓՈՒԼ 2. ՔՎԵԱՐԿՈՒԹՅԱՆ ՄԵԿՆԱՐԿԸ
Սեպտեմբերի 25-ին, ժամը 00:00-ից այստեղ՝ իմ գրական բլոգ-կայքում, առանձին էջով և հատուկ ծրագրի օգտագործմամբ կմեկնարկի «Հանուն Բնության» գրական մրցույթին Ֆեյսբուքի միջոցով հայտ ներկայացրած հեղինակների ստեղծագործությունների ԱՌՑԱՆՑ (ՕՆԼԱՅՆ) ՔՎԵԱՐԿՈՒԹՅՈՒՆԸ: Մինչ քվեարկության մեկնարկը, նշված էջը պարբերաբար թարմացվելու է՝ ներկայացնելով մրցույթի մասնակիցների անվանացանկը, ստեղծագործություններն ու ֆեյսբուքյան էջերը:
Քվեարկության պատուհանը բացվելուն պես, մրցույթի բոլոր մասնակիցներին այդ մասին կտեղեկացվի նաև Ֆեյսբուքով, որպեսզի նրանք իրենց ֆեյսբուքյան էջերում Ընկերներին ևս տեղեկացնեն քվեարկության մեկնարկի մասին:
Այցելելով քվեարկության էջը՝ մարդիկ կկարողանան քվեարկել իրենց նախընտրած հեղինակի օգտին, իսկ հեղինակներին ընդամենը կմնա հորդորել իրենց Ընկերներին և Ընթերցողներին՝ ակտիվորեն մասնակցելու քվեարկությանը:
Մրցույթի համար ընտրվել է օնլայն, բաց ու թափանցիկ քվեարկության ձևը, որպեսզի մրցույթը տարաբնույթ հանձնաժողովների սուբյեկտիվ ու երբեմն կողմնակալ գնահատականներից զերծ լինի, և հաղթի հենց բուն ստեղծագործությունը:
ՈՒՇԱԴՐՈՒԹՅՈՒՆ. Յուրաքանչյուր «IP»-ից հնարավոր է քվեարկել միայն մեկ անգամ և քվեարկելիս հնարավոր է ձայն տալ միայն մեկ հեղինակի օգտին:
ՓՈՒԼ 3. ՔՎԵԱՐԿՈՒԹՅԱՆ ԵՎ ԱՄԲՈՂՋ ՄՐՑՈՒՅԹԻ ԱՄՓՈՓՈՒՄԸ
Օնլայն քվեարկությունը կայքում կտևի 1 շաբաթ և կավարտվի հոկտեմբերի 1-ին, ժամը՝ 00:00-ին:
Հոկտեմբերի 2-ին, քվեարկությանը՝ բոլորին տեսանելի արդյունքներով, ամենաշատ ձայն հավաքած երեք մասնակիցները կճանաչվեն «Հանուն Բնության» գրական մրցույթի հաղթողներ:
Հոկտեմբերի 4-ին՝ Կենդանիների պաշտպանության միջազգային օրը, Բնության համաշխարհային հիմնադրամի հայաստանյան մասնաճյուղում («WWF-Հայաստան») կկայանա մեր հանդիպումը: Մրցույթի հաղթողներին, հանդիսավոր կերպով, նվեր կտրվեն «WWF-Հայաստանի» աջակցությամբ հրատարակված «Ապրելու իրավունք» և «Լռության գինը» վերնագրերով բնապահպանական իմ հայտնի գրքերը, «Գարնանային ռեքվիեմ» վերնագրով պատմվածքների իմ ժողովածուն, ինչպես նաև «WWF-Հայաստանի»՝ Բնությանը նվիրված արժեքավոր այլ գրքեր և հուշանվերներ:
Անկախ արդյունքներից, մրցույթի բոլոր մասնակիցները առցանց կստանան մասնակցության թվային վկայագրեր:
ՈՒՇԱԴՐՈՒԹՅՈՒՆ. Նվեր՝ մրցույթի բոլոր մասնակիցներին: Ի՞նչ է այն իրենից ներկայացնում: Բանն այն է, որ «Հանուն Բնության» գրական մրցույթի մասնակիցներն ի սկզբանե արդեն հաղթող են, քանի որ նրանց ստեղծագործությունները՝ որպես Բնությանը ձոնված յուրօրինակ աշխատանքներ, խնամքով և գեղեցիկ ձևավորմամբ ներկայացվելու են մեծ լսարան ունեցող «Արվեստասեր» գրական-ստեղծագործական բլոգ-կայքում: Սակայն «Արվեստասերի» անակնկալ նվերը սրանով չի սահմանափակվում, այլ հետևյալն է. որպես ստեղծագործական խրախուսանք յուրաքանչյուր հեղինակին՝ մրցույթի մասնակցության պահից ի վեր, «Արվեստասերի» կողմից սիրով, անվճար բացվելու է նրա անվանական բաժինը՝ հետագա ստեղծագործությունները ներկայացնելու համար: Այսինքն, անկախ նրանից, թե մրցույթի մասնակիցը հաղթում է, թե ոչ, նա արդեն շահում է, քանի որ ունենում է ստեղծագործական անհատական հարթակ՝ «Արվեստասերում», որի միջոցով իր ստեղծագործությունները կարող է ներկայացնել հանրությանը:
Այցելիր՝ «WWF-Հայաստանի» վեբկայքը / Միացիր՝ WWF-Հայաստանի ֆեյսբուքյան էջին
Հատկանշական է, որ մրցույթի արդյունքներով հաղթող ճանաչված մասնակիցների հետ իմ հանդիպումը հենց «WWF-Հայաստանում» ինքնին շատ խորհրդանշական է: «WWF-Հայաստանը» աշխարհի ամենամեծ բնապահպանական կառույցի՝ WWF-ի, հայաստանյան պատվելի ներկայացուցչությունն է, որը մեծ ներդրում ունի հայրենի Բնության պահպանության գործում: Այնպես որ, մրցույթի մասնակիցներն հնարավորություն կունենան հաղորդակից դառնալու «WWF-Հայաստանի» բազմամյա, շնորհակալ գործունեության արդյունքներին, ծանոթանալու «WWF-Հայաստանի»՝ բնապահպանությանն ուղղված նվիրական ջանքերին:
Մրցույթի, դրա հաղթողների և «WWF-Հայաստանում» նվերների հանձնման արարողության մասին լայնորեն կտարածվի ԶԼՄ-ներում:
Վերջաբան.
Եվ այսպես, սիրելի՛ բարեկամներ, բաց մի՛ թողեք այս բացառիկ առաջարկը՝ քայլ անելու հանուն Բնության, ստեղծագործելու, հաղթելու և նվեր ստանալու Ձեր սիրելի բնասեր գրողի մակագրությամբ գրքերը: Աշխարհին Ձեր ասելիքը հղելով՝ Դուք էլ ունեցեք աշխարհի ամենամեծ՝ ԱՄՆ-ի Կոնգրեսի գրադարանում գրանցված «Ապրելու իրավունք» գիրքս: Այդ և մյուս բոլոր նվերներին կարող եք արժանանալ ընդամենը Ձեր գրական տաղանդով, ստեղծագործելու Ձեր ուրույն շնորհով: Մասնակցե՛ք «Հանուն Բնության» գրական մրցույթին, եղեք ակտի՛վ, թող Բնությանը ձոնված Ձեր ինքնատիպ գրական ստեղծագործության մասին իմանան բոլորը և դրանից շահի Բնությունը, շահեք Դուք և Ձեր սիրելի հեղինակը: Ստեղծագործեք հանուն Բնության՝ մեծացնելով հետաքրքրությունը, սերն ու հարգանքը Բնության նկատմամբ:
Հարգանքով՝
Առլեն Շահվերդյան
Գրող, «Հանուն Բնության» գրական մրցույթի հեղինակ
———————————————————————————
Որպես ամփոփ հիշեցում՝
ՄՐՑՈՒՅԹԻ ԺԱՄԱՆԱԿԱՑՈՒՅՑԸ.
1. Սեպտեմբերի 1-ից մինչև սեպտեմբերի 24-ը, ժամը՝ 00:00 – Մրցույթի առաջին փուլի՝ մասնակցության հայտերի ընդունում
2. Սեպտեմբերի 25-ի ժամը՝ 00:00-ից մինչև հոկտեմբերի 1-ը, ժամը՝ 00:00 – Մրցույթի երկրորդ փուլի՝ օնլայն քվեարկության, անցկացում
3. Հոկտեմբերի 2 – Մրցույթի եզրափակիչ փուլի՝ արդյունքների ամփոփում
__________________________________
ՈՒՇԱԴՐՈՒԹՅՈ՛ՒՆ. Սույն գրական բլոգի հեղինակային իրավունքների պաշտպանության վերաբերյալ
Սույն բլոգ-կայքի հեղինակային իրավունքները պատկանում են դրա հեղինակին՝
Առլեն Շահվերդյանին: Բլոգում տեղ գտած նյութերը պաշտպանված են Հեղինակային իրավունքով: Մեջբերումներ անելիս հղումը arlenshah.wordpress.com-ին պարտադիր է: Հեղինակային հոդվածների, գրառումների, լուսանկարների մասնակի կամ ամբողջական վերարտադրությունն այլ կայքերում կամ զանգվածային լրատվամիջոցներում առանց arlenshah.wordpress.com-ին հղման արգելվում է:
Գրական բլոգ | Ֆեյսբուք | Թվիթեր | Յութուբ
Առլեն Շահվերդյանի գրական բլոգ. «Տոն, որը միշտ քեզ հետ է»,- Էռնեստ Հեմինգուեյ
__________________________________
ATTENTION! About this Literary Blog Copyright Protection
Arlen Shahverdyan, the Author of this Blog possesses its Copyright. All the materials of this blog are Copyright protected. When quoting, the reference (link) to arlenshah.wordpress.com is compulsory. The partial or complete reproduction of the Author’s articles, posts or photos in other sites or Mass Media is prohibited without the reference to arlenshah.wordpress.com.
Literary blog | Facebook | Twitter | Youtube
Arlen Shahverdyan’s literary blog: “A moveable feast”,- Ernest Hemingway
Առլեն Շահվերդյան 