Առլեն Շահվերդյան

Home » Տարբեր / Various

Category Archives: Տարբեր / Various

Ի՞նչ է բլոգը

July 10, 2017 14:03 / 21 Comments on Ի՞նչ է բլոգը

Սիրելի բարեկամներ, այս հոդվածը նվիրված է նրան, թե ինչ բլոգը: Ասեմ ինչու առաջացավ այսպիսի հոդվածի անհրաժեշտություն: Նախ համացանցում բլոգի մասին տեղեկույթը հիմնականում օտարալեզու է: Բացի այդ, շատերը չեն տարբերակում բլոգը էլեկտրոնային այլ կայքերից: Ոմանց մոտ անգամ որոշակի թյուր ընկալում կամ ոչ լիարժեք պատկերացում կա բլոգների ու բլոգերների գործունեության վերաբերյալ: Պատճառները լիովին հասկանալի են: Ճիշտ է` դրանք երբեմն սուբյեկտիվ են, սակայն հիմնականում` օբյեկտիվ: Ի վերջո բլոգը նոր երևույթ է, և բնական է, որ համեմատաբար ավագ սերունդն այդքան էլ տեղեկացված չէ էլեկտրոնային այս տիրույթների նորամուծությունների, առանձնահատկությունների, վերջին զարգացումների մասին. այսօր բլոգը հիմնականում երիտասարդ սերնդի կողմից օգտագործվող գործիքարանի անքակտելի մասն է: Ելնելով սրանից` շատ բնական է, որ շատերը չգիտեն, թե ինչ է բլոգը կամ բավարար պատկերացում չունեն դրա վերաբերյալ: Դա շատ նորմալ է և, կարծում եմ, որ ոչ մեկը իրավունք չունի մեղադրելու ինչ-որ մեկին, ի վերջո պարտադիր էլ չէ, որ մարդը շատ լավ իմանա, թե ինչ է բլոգ կոչվածը: Եվ բացի այդ, նույն հաջողությամբ ավագ սերունդը կարող է խոսել այնպիսի բաների մասին, որոնց մասին երիտասարդ սերունդը պատկերացում անգամ չունի: Սակայն քանի որ բլոգը դարձել է մեր առօրյա կյանքի մի մասնիկը, իսկ ես էլ ամեն օր զբաղվում եմ բլոգով, ապա իմ պարտքը համարեցի կայքիս բոլոր ընթերցողներին հնարավորինս հանգամանալից, մատչելի կերպով և հայերեն լեզվով ներկայացնել, թե վերջապես ինչ ասել է բլոգ, հաղորդել բլոգի մասին գոնե հիմնական տեղեկույթը: Գիտեմ, որ շատերի համար այս նյութը ոչ մի նոր բան չի պարունակի, քանի որ նրանք լավ իրազեկված են բլոգներից: Սակայն հավատացնում եմ, որ շատերին էլ հոդվածը կօգնի մի փոքր ավելի իմանալ բլոգների մասին: Հավելեմ, որ ինչպես շատ երևույթներ, բլոգները նույնպես մեր` հայկական, իրականության մեջ արագ տարածում գտան և այսօր համարվում են ակտիվ շփման և ինքնաարտահայտման շատ ճկուն, դինամիկ միջոց: Սա շատ ողջունելի է և ուրախալի հանգամանք է, քանի որ որքան տարածվեն մեր իրականության մեջ տեղեկատվական տեխնոլոգիաները, այնքան դրանք ավելի կզարգանան, կհղկվեն: Որպես արդյունք` բլոգները ժամանակի հետ ավելի որակյալ կդառնան, այս ասպարեզը կդառնա ավելի պրոֆեսիոնալ և փորձառու, իսկ համացանցում տեղադրվող «արտադրանքը»` գրագետ, խելամիտ և ազնիվ:    

Եվ այսպես, բլոգն այսօր ստեղծագործ (և ոչ միայն) մարդկանց ինքնաարտահայտվելու և նաև ազատորեն շփվելու ճկուն ու ամենապրոակտիվ մեթոդներից մեկն է, եթե ոչ` առաջինը: Բլոգը հնարավորություն է տալիս ուղղելու խոսքը ընթերցողին և ակնկալելու արագ արձագանք: Մի մեջբերում անեմ «http://www.e-armenians.com/» կայքից. «…Ընդհանուր առմամբ, բլոգը վերջին տասնամյակում մեծ հեղինակություն վայելած ինտերնետային ինտերակտիվ կայք է, որի բովանդակության ձեւավորմանն անմիջականորեն մասնակցում են այդ բլոգից բոլոր օգտվողները՝ ինչպես բլոգերները (գրառումներ կատարողները ու հոդվածներ ներկայացնողները), այնպես էլ կայքի մյուս այցելուները (որոնք կարող են հանդես գալ որպես մեկնաբանողներ): Այլ կերպ ասած, բլոգն ինքնադրսևորման «օն-լայն» տարբերակ է, երբ Ձեր գրառումները մատչելի են դառնում ողջ ինտերնետային հանրությանը: Գրում եք դուք՝ ընթերցում ու իրենց կարծիքներն ու տպավորություններն են թողնում բոլորը»: Կարծում եմ` շատ տիպիկ ու ճշգրիտ բնութագրում է:

Այժմ այս ամենի մասին շատ ավելի մանրամասն` հիմքում ունենալով բլոգների մասին համացանցում առկա հայերեն տեղեկույթը` «Վիքիպեդիա»-ում, այլ աղբյուրներում:

Բլոգ (անգլերեն՝ blog, «web log», «իրադարձությունների ցանցային մատյան կամ օրագիր») — կայք, որի հիմնական բովանդակությունը պարբերաբար թարմացվող գրառումներ են, որոնք պարունակում են տեքստ, պատկերներ կամ մուլտիմեդիա: Գրեթե բոլոր բլոգներին բնորոշ են տվյալ ժամանակահատվածում ակտուալ գրառումները, որոնք, որպես կանոն, դասավորվում են հակառակ ժամանակագրական դասավորությամբ (վերջին գրառումը սկզբում): Ավանդական օրագրերից բլոգը տարբերվում է նրանով, որ, սովորաբար, հասարակական է և նախատեսում է կողմնակի ընթերցողներ, որոնք կարող են հրապարակային բանավեճի մեջ մտնել հեղինակի հետ (բլոգային գրառմանն արած մեկնաբանությունների, կամ սեփական բլոգային գրառումների միջոցով): Իհարկե պարտադիր չէ, որ բլոգը լինի հրապարակային, քանի որ բլոգների թեմատիկ ընդգրկումը լայն է ու խիստ բազմազան, այսինքն բլոգները կարող են ունենալ ինչպես հեղինակային-ստեղծագործական ընդգրկում և ուղղվածություն, այնպես էլ նույն հաջողությամբ լինել քաղաքական, լրատվական, ժամանցային և կամ այլ ուղղվածության:

Ըստ հեղինակների կազմի բլոգները լինում են անձնական, խմբակային (կորպորատիվ, ակումբային) կամ հրապարակային (բաց):

Բլոգները տարբերակվում են`

Ըստ հեղինակների

  • Անձնական բլոգ – վարվում է մեկ անձի (հեղինակի) կողմից
  • «Ուրվական» բլոգ – վարվում է անհայտ անձի կողմից, մեկ այլ անձի անունից
  • Կոլեկտիվ կամ սոցիալական բլոգ – վարվում է մի խումբ մարդկանց կողմից՝ բլոգի տիրոջ կամ մոդերատորների կողմից որոշված կանոններով
  • Կորպորատիվ բլոգ – վարվում է մեկ կազմակերպության անդամների կողմից

Ըստ բովանդակության տեսակի

  • Տեքստային բլոգ – հիմնականում պարունակում է տեքստեր
  • Ֆոտոբլոգ – հիմնականում պարունակում է լուսանկարներ
  • Երաժշտական բլոգ – հիմնականում պարունակում է երգեր
  • Պոդկաստինգ կամ բլոգկաստինգ – հիմնական պարունակությունը կազմում են ձայնագրիչի միջոցով ձայնագրված ձայնային հաղորդագրությունները
  • Վիդեոբլոգ – հիմնականում պարունակում է տեսանյութեր

Ըստ բովանդակության առանձնահատկության

  • Կոնտենտային բլոգ – բլոգ, որտեղ հրապարակվում են հեղինակային նյութեր
  • Մոնիտորինգային բլոգ – բլոգ, որը հիմնականում պարունակում է հղումներ դեպի այլ կայքեր
  • Մեջբերումներով բլոգ – բլոգ, որտեղ հատվածներ են մեջբերվում այլ բլոգներից
  • Տամբլելոգ, Տամբլոգ, Տլոգ – բլոգ, որի յուրաքանչյուր գրառում ունի որոշակի ֆորմատ՝ հղում, մեջբերում, վիդեո, լուսանկար, երկխոսություն, կամ այլ
  • Սպլոգ – սպամ-բլոգ

Ըստ տեխնիկական հիմքի

  • Stand alone բլոգ – առանձին հոստինգի և “շարժիչի” վրա կառուցված բլոգ
  • Պլատֆորմային բլոգ – որևէ պլատֆորմի վրա զետեղված բլոգ (LiveJournal, WordPress, Blogger կամ այլ)
  • Մոբլոգ – բլոգ, որը վարվում է բջջային կամ շարժողական տեխ. միջոցներով

Բլոգ պլատֆորմներ

Հայ բլոգերների շրջանում հայտնի բլոգ-պլատֆորմներ LiveJournal, WordPress.com, Blogger
Հայ բլոգերների շրջանում հայտնի սոցիալական բլոգ սերվիսներ Facebook, Myspace,
Այլ բլոգ-պլատֆորմներ Ya.ru, Блоги@mail.ru, Tumblr, Xanga, LiveInternet

Հավելեմ, որ բլոգով զբաղվող, բլոգը վարող անձանց անվանում են բլոգերներ, բլոգը վարելը կոչվում է բլոգինգ, իսկ բլոգների «հանրույթը» կամ միջավայրը` բլոգոսֆերա:

Ի դեպ, բլոգները կարող են լինել նաև պաշտոնական, եթե պաշտոնապես ներկայացնում են որևէ կազմակերպության, հաստատության կամ անհատի գործունեությունը, այսինքն այդ բլոգներում տեղադրված տեղեկույթը, նյութերը «մատակարարվում են» համացանց հենց դրանց հեղինակի կամ սեփականատերի կողմից: Պաշտոնական կարող է լինել ինչպես, օրինակ, էստրադային աստղի, այնպես էլ որևէ ամսագրի կամ պարբերականի բլոգը, քաղաքական գործչի կամ ստեղծագործող հեղինակի: Օրինակները կարող են բազմաթիվ լինել:

Պլատֆորմային բլոգները, այսինքն նրանք, որոնք հիմնված են բլոգերային միջազգային որևէ տիրույթի բազայի վրա, լինում են անվճար կամ վճարովի: Բլոգը ստեղծողը ինքն է որոշում, թե ինչպիսի բլոգ է ուզում: Վճարովի և անվճար բլոգների միջև կան տեխնիկական (գործիքարանի, ծավալի և այլն) տարբերություններ, և ընտրությունը կատարվում է բլոգերի հայեցողությամբ ու, իհարկե, նրա ունեցած հնարավորություններով:

Բլոգի գործունեությունը և դրա հարատևությունը կախված է բլոգերից, նա ինքն է որոշում շարունակի վարել բլոգը, թե ոչ: Խոսքը, իհարկե, վերաբերվում է պատշաճ բովանդակությամբ բլոգներին, նրանց, որոնց «կոնտենտը» և ուղղությունը չի ենթադրում օրենքով արգելված նյութեր ու դրանց տարածում:

Բլոգի արտաքին տեսքի ընտրությունը նույնպես դրա հեղինակինն է, առավել ևս, որ նրան առաջարկվում է ընտրության լայն հնարավորություն: բացի այդ, հեղինակը ինքը միշտ կարող է անել սեփական ձևավորումները, իր ճաշակով, ինչը կվկայի նրա յուօրինակության մասին:

Պլատֆորմային բլոգ բաց անելու համար, որպես կանոն, անհրաժեշտ է գրանցվել: Ձեզանից պահանջվում է Ձեր անձի և, մասնավորապես` կոորդինատների հետ կապված հիմնական տեղեկույթի տրամադրում, ոչ ավելին: Խոսքը հիմնականում էլեկտրոնային փոստի Ձեր հասցեի մասին է և այլն:  

Կհարցնեք, թե արդյո՞ք դժվար է վարել սեփական բլոգը: Ասեմ, որ բլոգ բաց անելուց ու այն վարելուց առաջ շատ լավ կլինի, եթե նախ ուսումնասիրեք այս բնագավառը, ճանաչեք բլոգ կոչված երևույթը և ինքներդ Ձեզ համար նախ որոշեք, թե արդյո՞ք Դուք ունեք ասելիք ու անելիք այդ բնագավառում: Շատերն ունեն ինքնաարտահայտվելու ցանկություն և ամեն մեկի մոտ դա յուրովի է դրսևորվում: Բլոգը նույնպես ինքնաարտահայտվելու առաջադեմ մի միջոց է: Սակայն նախքան բուն բլոգինգով զբաղվելը, լուրջ մարդը նախ կուսումնասիրի ու նոր միայն կստանձնի սեփական ասելիքը հրապարակելու և ուրիշների կարծիքներն ու տպավորությունները բաց ճակատով, անկեղծորեն ընդունելու և հաշվի առնելու պատասխանատվությունը: Սա մի «նավարկություն» է, որը սկսելուց առաջ անհրաժեշտ է նախ յուրացնել բլոգի գործիքարանը, հասկանալ, թե ինչ ես ուզում անել այս բնագավառում և ինչու ես ուզում դա անել: Շատ կարևոր մի հանգամանք ևս. ցավոք մեզանում բլոգինգով հաճախ զբաղվում են այնպիսի մարդիկ, ովքեր ունեն, մեղմ ասած, թերի խոսք և լեզվի իմացության ոչ բավարար ցուցանիշ, կարճ ասած իրենց գրառումներով աղավաղում են մայրենին: Կարծում եմ, որ չի կարելի վատ մայրենիով բլոգ վարել, քանի որ այդպիսի լեզուն մտնում է համացանց, որը հասանելի է ԲՈԼՈՐԻՆ: Թերի, կիսագրագետ կամ նույնիսկ անգրագետ հայերենով բլոգ վարելը խաթարում է մեր հասարակության լեզվամտածողությունը` դառնալով մայրենի լեզվի խեղաթյուրման պատճառներից մեկը: Ցավալի է, որ այսօրինակ տխուր պատկերը առկա է նաև մերօրյա տպագիր մամուլում և հեռուստատեսությունում: Ոմանք կընդդիմանան, թե բլոգով զբաղվող մարդը ազատ է և ինչպես ուզի կգրի: Ես կարող եմ որպես հակափաստարկ բերել այն, որ թեև բլոգով զբաղվող մարդ ազատ է և կարող է անգամ անգրագետ գրել, սակայն նրա մեջ գոնե պետք է խոսա մայրենի լեզվի նկատմամբ հարգանքը, խնամքն ու պատասխանատվությունը, էլ չեմ ասում ինքն իրեն հարգելը: Սակայն սա քննարկման այլ թեմա է:

Ամփոփելով այս ամենը` կարելի է ասել, որ բլոգ ստեղծելուց առաջ պետք է և ճիշտ է` ա) նախապես յուրացնել բլոգի գործարկման, օգտագործման գործիքարանը, բ) ճշգրտել, նախանշել սեփական անելիքն ու ասելիքը բլոգոսֆերայում, գ) գործին մոտենալ սիրով, նվիրվածությամբ, հետևողական և խիստ պատասխանատու կերպով: Երբեք չպետք է մոռանալ, որ համացանց «ուղարկված» նյութը կարող է կարդալ յուրաքանչյուրը: Ես խորապես համոզված եմ, որ լեզվական մշակույթի ու էթիկայի առումով` գրագետ, իսկ բովանդակության առումով` հետաքրքիր բլոգ ստեղծելու ու այն վարելու համար անհրաժեշտ է ցանկություն, ժամանակ և ցանկություն` ունենալու այդ ժամանակը: 

Սիրելի բարեկամներ, ոչ մեկը չի ծնվում որպես բլոգեր 🙂 դա բնատուր չէ 🙂 ինչպես բնատուր չէ, օրինակ, տիեզերագնաց լինելը, քանի որ տիեզերագնաց դառնում են: Սակայն մեզանից յուրաքանչյուրը երազում է տիեզերքի մասին, այսինքն մեր երազանքներում ու նպատակներում մեզանից յուրաքանչյուրը հոգու խորքում «տիեզերագնաց» է` ձգտելով գրավել նոր հորիզոններ և գրանցել նոր հաղթանակներ ու հաջողություններ: Համացանցն էլ է մի այդպիսի անեզր, անծայրածիր ու յուրօրինակ «տիեզերք»: Այն նվաճելուց առաջ պետք է նախ վստահ լինել սեփական երազանքների ու բարի նպատակների մեջ: Պետք է գործին մոտենալ մեծ պատասխանատվությամբ, կարողանալ հաղորդել սեփական ասելիքը` երբեք չթերագնահատելով մյուսինը, կարողանալ հարգել ուրիշի կարծիքը ու հիմնավորել սեփականը և, իհարկե, կարողանալ ներկայանալի լինել, մի խնդիր, որը շատերի համար դժվար հաղթահարելի է, սակայն` ոչ երբեք անհաղթահարելի: Կարծում եմ, որ այս մոտեցումները հատուկ և անհրաժեշտ են ոչ միայն բլոգինգին, այլև աշխատանքի, գործունեության բոլոր բնագավառներին: Այս ամենի հիմքում նախ և առաջ իմացությունն է, այսինքն նա՛խ պետք է սովորել և մի՛շտ պետք է սովորել, միայն այդպե՛ս հնարավոր է ձեռք բերել գիտելիքներ և միայն ա՛յդ ճանապարհով է հնարավոր մի օր հանրությանը ներկայանալ սեփական խոսքով, ներկայանալ վստահ, ազնվորեն ու անկեղծորեն: Բլոգը էլեկտրոնային օրագիր է, իսկ օրագիրը, գաղտնիք չէ, որ մարդու ամենանվիրական գրառումների անձնական ճտեմարանն է, նրա կյանքի տարեգրության ամենաանկեղծ «հարթակներից» մեկը: Նույն և բլոգը: Այնպես որ, հասարակությանը ներկայանալուց առաջ պետք է նախ վստահ լինել սեփական անկեղծության մեջ:

Կյանքը զարգանում և առաջ է ընթանում արագ տեմպերով: Համոզված եմ, որ տարիներ հետո ապագա սերունդների համար այն, ինչով այսօր զբաղվում ենք մենք, կամ թեկուզ նույն բլոգինգը, հնարավոր է, որ հետամնաց զբաղմունք թվա: Չէ՞ որ մենք էլ այսօր արդեն ժամանակավրեպ ենք համարում շատ բաներ, այսօր արդեն գրեթե անցյալ են մեզ համար, օրինակ, նույն VHS տեսաերիզները, Floppy դիսկերը, փոստային նամակագրությունը և այլն: Սակայն քանի որ մենք այսօր ենք ապրում, ապա պետք է ճանաչենք ժամանակի միջոցները, իսկ եթե զբաղվում ենք դրանցով, ապա փորձենք ու ջանանք մեր համեստ ներբերումն ունենալ այդ բնագավառի զարգացման գործում:

Ես համարում եմ, որ հայկական ցանկացած կայացած բլոգ կամ կայք հաղթանակած է, հաղթող է, եթե իր գոյությունը արդարացված է, հիմնավորված և օգտակար, ասելիքը ուրույն է, գրագետ, գործունեությունը բարեխիղճ է, սիրված ու սպասված, բովանդակությունը հարուստ է ու հետաքրքիր,  իսկ այցելուների բանակն էլ շինծու չէ և նրանց արձագանքներն էլ անկեղծ են: Այսպիսի ցանկացած հայկական բլոգ հիրավի արդեն հաղթանակած է, և ես անսահման ուրախ եմ, որ այս դաշտը հետզհետե ավելի ու ավելի է զարգանում, բյուրեղանում: Ես էլ եմ գործում այս դաշտում ու միշտ գործելու եմ և, բնականաբար, ինքս էլ շահագրգռված եմ, որ հայկական բլոգոսֆերան մշտապես առաջընթաց գրանցի ու զարգանա:

Վերջում ուզում եմ սրտանց ողջունել բոլոր նրանց, ովքեր զբաղվում են բլոգինգով, վարում են բլոգ` մաղթելով նորանոր ձեռքբերումներ, իսկ նրանց, ովքեր սկսնակ բլոգերներ են, կամ հենց նոր որոշեցին զբաղվել բլոգինգով, կցանկանայի սրտանց մաղթել հաջողություններ այդ չափազանց հետաքրքիր «նավարկության» մեջ, մաղթել իրենց բլոգով անկեղծորեն հետաքրքրվողների և իրենց ստեղծագործական գործունեությունը անկեղծորեն գնահատողների ու համակրողների մի ամբողջ բանակ: Ստեղծեք ու զարգացրեք Ձեր բլոգները մեծ ոգևորությամբ ու ջանադրաբար: Համոզված եմ, որ կհաջողեք:

Այսքանը, կարծում եմ և անկեղծորեն հուսով եմ, որ Դուք օգտակար ու հետաքրքիր կհամարեք այս հոդվածը, հուսով եմ, որ այն տվեց Ձեր որոշ հարցերի պատասխանը` ինչ-որ չափով լույս սփռելով այն բանի վրա, թե ինչ է բլոգը:
© Առլեն Շահվերդյան, 12.01.2012, 13.01.2012

Զրույցներ կեսգիշերին / Midnight Conversations

May 16, 2017 10:55 / 2 Comments on Զրույցներ կեսգիշերին / Midnight Conversations

Սեղմեք նկարի վրա՝ հաղորդումը դիտելու համար / Click on the picture to watch the program

Սիրելի Ընթերցողներ,

Պատիվ ունեմ ներկայացնելու Ձեզ ընդարձակ հարցազրույց ինձ հետ՝ հայտնի հեռուստահաղորդավար Գագիկ Հովսեփյանի «Զրույցներ կեսգիշերին» հեղինակային ծրագրում («Հ3» հեռուստաընկերություն, 12.05.2017): Այս մեծ ու հետաքրքիր զրույցի ընթացքում մենք խոսեցինք ոչ միայն իմ գրական գործունեության մասին (ներառյալ՝ իմ գրքերն ու բանաստեղծությունները), այլև արծարծեցինք հետաքրքիր թեմաներ կյանքի ու մահվան, սիրո և երջանկության վերաբերյալ: Զրույցի ընթացքում առանձնահատուկ ուշադրություն դարձրեցինք մարդու և բնության միջև փխրուն ու զգայուն հարաբերությանը, բնության պահպանության հարցում մարդու դերին և հաջորդ սերունդների համար բնության պահպանության կարևորության գիտակցմանը:

Ինձ համար պատիվ էր լինել Գագիկ Հովսեփյանի հյուրը, ում բազմամյա հեռուստատեսային փորձն ու հեղինակությունը մեծ հարգանք է ներշնչում: Նա երկար տարիներ աշխատել է հայրենական հեռուստատեսություններում և նրա հաղորդումներն ու եթերները մշտապես առանձնացել են հեռուստատեսային բարձր որակով:

Խորին երախտագիտությունս եմ հայտնում իմ հարգելի ընկերոջը այս հետաքրքիր հարցազրույցի համար և հուսով եմ, որ դուք հետաքրքրությամբ կդիտեք հաղորդումը:

Հարգանքով՝ Առլեն Շահվերդյան:

***

Dear Readers, 

I have the honor to introduce to you a large interview with me in the author’s program of the famous TV presenter Gagik Hovsepyan, entitled “Midnight Conversations” (Armenian 3rd Television, 12.05.2017). During this large and interesting conversation, we talked not only about my literary activity, including my books and poems, but also touched interesting topics about life and death, love and happiness, and especially about the fragile relations between human and nature, about the important role of human in the preservation of the nature and about the precipitation of the importance of the nature protection for the next generations.

It was an honor for me to be Gagik Hovsepyan’s guest, whose many years of television experience and authority inspire great respect. He has worked for many years on many Armenian local televisions and his programs are always distinguished by a high television level.

I cordially thank my respectful friend for an interesting interview and I hope that you will watch this program with interest.

Respectfully, Arlen Shahverdyan. 

Уважаемые Читатели,

Для меня честь представить вам большое интервью со мной, в авторской программе известного телеведущего Гагика Овсепяна – “Полночные беседы” (Третий канал Армении, 12.05.2017). Во время этой большой и интересной беседы мы поговорили не только о моей литературной деятельности: о моих книгах и стихотворениях, но и затронули интересные темы про жизнь и смерть, про любовь и счастье и, особенно, о хрупком взаимоотношении между человеком и природой, о важной роли человека в сохранении природы и об осознании важности охраны природы для следующих поколений.

Для меня было честью быть гостем Гагика Овсепяна, многолетний телевизионный опыт и авторитет которого внушает большое уважение. Он много лет работал на многих отечественных телевидениях и его программы всегда отличаются высоким телевизионным уровнем.

Я благодарен моему многоуважаемому другу за интересное интервью и надеюсь, что вы с интересом посмотрите эту программу.

С уважением, Арлен Шахвердян.

__________________________________

ՈՒՇԱԴՐՈՒԹՅՈ՛ՒՆ. Սույն գրական բլոգի հեղինակային իրավունքների պաշտպանության վերաբերյալ
Սույն բլոգ-կայքի հեղինակային իրավունքները պատկանում են դրա հեղինակին՝
Առլեն Շահվերդյանին: Բլոգում տեղ գտած նյութերը պաշտպանված են Հեղինակային իրավունքով: Մեջբերումներ անելիս հղումը arlenshah.wordpress.com-ին պարտադիր է: Հեղինակային հոդվածների, գրառումների, լուսանկարների մասնակի կամ ամբողջական վերարտադրությունն այլ կայքերում կամ զանգվածային լրատվամիջոցներում առանց arlenshah.wordpress.com-ին հղման արգելվում է:

Գրական բլոգ | Ֆեյսբուք | Թվիթեր | Յութուբ
Առլեն Շահվերդյանի գրական բլոգ. «Տոն, որը միշտ քեզ հետ է»,- Էռնեստ Հեմինգուեյ
__________________________________

ATTENTION! About this Literary Blog Copyright Protection
Arlen Shahverdyan, the Author of this Blog possesses its Copyright. All the materials of this blog are Copyright protected. When quoting, the reference (link) to arlenshah.wordpress.com is compulsory. The partial or complete reproduction of the Author’s articles, posts or photos in other sites or Mass Media is prohibited without the reference to arlenshah.wordpress.com.

Literary blog | Facebook | Twitter | Youtube
Arlen Shahverdyan’s literary blog: “A moveable feast”,- Ernest Hemingway

Save the Planet Earth*
Մի տպեք այս էջն առանց անհրաժեշտության, մտածեք շրջակա միջավայրի մասին
Do not print out this page without need – think about the Environment

Post navigation

← Older posts
%d bloggers like this: