ՔՈ ԱՐՏԱՑՈԼԱՆՔԸ
Քո արտացոլանքը անձրևաջրից թրջված ասֆալտի պաղ մակերեսին
Պատվել է այնպե՜ս գեղեցիկ քողով՝ գունեղ լույսերի ներկապնակում,
Արտացոլքիդ մեջ՝ կյանքի եռուզեռ, լիրիկական տաղ, լուսեղեն տեսիլ,
Երազանքների և իրականի սիրուն խաչմերուկ, վերելք ու անկում…
Քո արտացոլանքը անձրևաջրից մեկեն գոյացած ջրափոսի մեջ
Ստեղծել է ուրույն ու փոքրիկ հանդես, ջրի աննկատ խաղ ալիքների,
Անձրևը կարծես սիրո թմբիրի վայելքն է ապրում, վայելք անընդմեջ,
Քնքուշ պատկերդ անուրջի նման ջրի ալիքում խայտում է էլի…
Քո արտացոլանքը պաղ ջրափոսի խնդուն ժպիտն է՝ քաղաքին հսկա
Եվ մանրակաթիլ անձրևից ծեծված նրա հայելու լույսերի փոթորկ,
Անձրևից թրջված պաղ ջրափոսում քնքուշ պատկերդ հրաշք է, որ կա,
Շոյիչ կախարդանք, որով հմայված անձրևը թրջում է գետինը ողորկ…
Առլեն Շահվերդյան
04.03.2014
© Բանաստեղծության հեղինակային իրավունքները պաշտպանված են, արգելվում է այն օգտագործել կամ հրապարակել մամուլում, կայքերում և սոցիալական ցանցերում՝ առանց բանաստեղծության հեղինակի անունը նշելու:
Առլեն Շահվերդյան 