Սիրելի բարեկամներ, ուրախությամբ ուզում եմ նշել, որ Երևանի կենդանաբանական այգու պաշտոնական կայքում տեղադրվել է «Ձեռքը` այգու «զարկերակին»» վերնագրով հոդվածս` «Այգին` այցելուների աչքերով» խորագրի ներքո: Տես հոդվածը:
Ուզում եմ նշել հոդվածում իմ տողերից մեկը. «Կարելի է ասել, որ այս հոդվածը արտահայտությունն է այն մեծ սիրո ու հարգանքի, որ տածում եմ մեր կենդանաբանական այգու նկատմամբ արդեն շատ երկար տարիներ»: Եվ իսկապես, այդ հոդվածը այգու նկատմամբ սիրո, գնահատանքի, հուշերի ու տպավորությունների մի համախումբ է, անկեղծ դրսևորում` ի նշանավորումն այն ամեն դրականի, որ այսօր տեղի է ունենում այգում: Ավելին. եթե «Ձեռքը` այգու «զարկերակին»» հոդվածիս առանցքում կենդանիների խնամակալության ինստիտուտի ներդրման` որպես այգում տեղի ունեցող նորամուծության, կարևոր հանգամանքն է, ապա հարկ եմ համարում անպայման նշել, որ այդ նորամուծությունը միակը չէ: Այգին այսօր բազմաթիվ նորամուծություններ է ունենում, կերպափոխվում է, ապրում է նոր կյանքով, նոր ռիթմով:
Պատիվ ունեմ ինձ համարելու Երևանի կենդանաբանական այգու բարեկամը: Ուրախ եմ, որ ջերմ, բերակամական հարաբերություններ են ձևավորվել իմ և այգու միջև: Ես անչափ գնահատում եմ այդ անկեղծ ու փոխադարձ հարգանքի, մարդկային համակրանքի հիման վրա ձևավորված միջավայրը: Այգու յուրաքանչյուր աշխատակից, այգու հետ ուղիղ կամ անուղղակի առնչություն ունեցող յուրաքանչյուր կառույց ու կազմակերպություն իր մեծ լուման է ներդնում այգու կերպափոխման ու զարգացման մեջ: Ամենափոքր դրական քայլն իսկ արդեն գովելի է, քանի որ այն ուրվագծում է զարգացման հստակ և անշեղ ուղենիշներ: Կարծում եմ, որ մեր հասարակությունը վաղուց պիտի դեմքով շրջվեր դեպի այգին` այն դիտելով ոչ միայն զուտ որպես ժամանցի վայր (ուր կարելի է այցելել, զվաճանալ վանդակների մեջ կենդանիներին դիտելով ու ինքնագոհ հեռանալ այգուց), այլ որպես կրթական օջախ: Այո՛, այգին այլևս գազանանոց չէ՛, որտեղ երբեմն այցելուները կենդանիներին վերաբերվում էին քամահրանքով ու մի տեսակ անհամարհանքով: Ոչ, այգին այլևս իսկապես կենդանաբանական է, այն վայրի բնության հետ ուղիղ առնչություն ունեցող մեր երկրի ամենամեծ մասնագիտական կառույցն է, առաջնային օղակը, որտեղ ուղիղ կերպով գործ ունեն վայրի բնության ներկայացուցիչների հետ: Այգին այսուհետև գիտահետազոտական և, որ ամենակարևորն է, գիտակրթակա՛ն կառույց է, ժամանակակից միջազգային պահանջներին համապատասխանել ձգտող նորաշունչ մի հաստատություն: Իր այս կոչման ճանապարհին այգին արդեն քիչ բան չի արել: Վայրի բնության և մշակութային արժեքների պահպանման հիմնադրամը, միավորելով բոլոր սրտացավ մարդկանց ջանքերը, փորձում է ավելի լավը դարձնել այգին: Ավելին, տարբեր ու տարաբնույթ ակցիաներով, միջոցառումներով, բնապահպանական ու բնաճանաչողական ծրագրերով, մրցույթներով հասարակությանը սեր ու հոգածություն է փոխանցում բնության նկատմամբ, ընդ որում և՛ այգու ներսում, և՛ այգու տարածքից դուրս` տարբեր փառատոնների և այլ միջոցառումների շրջանակներում: Այս ամենի հիմքում մարդկանց` բնությանը հնարավորինս մոտ լինելու գաղափարն է: Կարծում եմ, որ այս ճանապարհին մենք պետք է ոչ թե խանգարենք, այլ հակառակը` ամեն մեկս մեր տեղում, մեր ունեցած հնարավորություններով ու լծակներով քաջալերենք, օգնենք և լուսաբանենք այն բոլոր դրական քայլերը, որոնք արվում են այգում, այն առաջադեմ մոտեցումները, որոնք նպաստում են այգու զարգացմանը:
Ես պատվի մարդ եմ, և այն ինչ ասում եմ այգու մասին` իմ սեփական տպավորությունն է ու կարծիքը, ոչ մեկ այն ինձ չի հուշել կամ պարտադրել: Ես ինքս տեսնում եմ այգում դրական տեղաշարժը, մի այգու, որն այդքան սիրում եմ: Տեսնում եմ ու գրում, սա ի՛մ ձայնն է, ոչ թե ուրիշի «աղմուկը»: Միշտ համոզված եմ եղել, որ եթե մի լավ բան է արվում, ապա պետք է դա գնահատել, ասել ջերմ ու քաջալերող խոսքեր նրանց հասցեին, ում շնորհիվ քայլ առ քայլ այգին զարգանում է: Դուք էլ կարող եք տեսնել այդ փոփոխությունները` այցելելով այգի կամ ծանոթանալով դրանց այգու պաշտոնական կայքի միջոցով (http://www.yerevanzoo.am/):
Ինձ մնում է հավելել, որ շատ շուտով նոր` «Ապրելու իրավունք» վերնագրով առյուծների մասին գրքիս լույս ընծայումից հետո, ես այն մեծ սիրով նվիրելու եմ նաև այգուն` որպես մեր միջև անկեղծ ու բարիդրացիական հարաբերությունների ևս մեկ արտահայտություն: Ի դեպ, այդ գրքում կենդանաբանական այգու մասին բազմիցս նշվում է: Գիրքը նույնիսկ ավարտվում է Երևանի կենդանաբանական այգում մի տեսարանով:
Ուզում եմ ևս մեկ անգամ խորին շնորհակալություն հայտնել Երևանի կենդանաբանական այգուն` հոդվածիս նկատմամբ նման ուշադրության և բարի վերաբերմունքի համար: Ես շատ գնահատում եմ այգու տնօրինության` իմ հոդվածը այգու պաշտոնակայքում տեղադրելու այս անկեղծ նախաձեռնությունը և որոշումը: Համոզված եմ, որ մեր միջև համագործակցությունը դեռ տալու է իր արդյունավետ պտուղները: Շնորհակալ եմ նաև, որ հոդվածս կայքի անձնակազմի խմբագրության կողմից թարգմանվել և ներկայացված է անգլերեն:
Սիրելի բարեկամնե՛ր, եկեք չմոռանանք, որ այն ամբողջ դրականը, այն բոլոր ջանքերը, որ գործադրվում են այգում` արվում են մեզ համար, մեր հասարակության ու մեր երկրի համար: Չմոռանանք նաև, որ յուրաքանյուրս պետք է մեր նպաստավոր լուման ներբերենք և՛ այգու, և՛ մեր պետության զարգացման գործում: Եթե յուրաքանչյուրս ապրենք այս գիտակցումով, ապա ոչ միայն Երևանի կենդանաբանական այգին, այլև Հայաստանի Հանրապետությունը կվերածվի շատ ավելի զարգացած, առաջադեմ երկրի: Ես հավատում եմ դրան: Համոզված եմ, որ դրան հավատում են նաև այն բոլոր մարդիկ, ովքեր ամեն օր աշխատում են մեր կենդանաբանական այգում, հոգ տանում կենդանիներին, խնամում նրանց` սիրելով իրենց աշխատանքը ու մեծ նվիրումով տրվելով դրան: Շնորհակալություն Երևանի կենդանաբանական այգուն, ամբողջ անձնակազմին և հաջողություններ` բոլոր հետագա ձեռնարկումներում:
© Առլեն Շահվերդյան, 24.01.2012
Կարդացեք նաև` «Ձեռքը` այգու «զարկերակին»»:
Arlen jan shnorhakal enq vor mez aydqan shat havatum ev vstahum eq.
Թերեզա ջան, ես էլ եմ շատ շնորհակալ նման անկեղծ վերաբերմունքի համար ամբողջ այգու կողմից: Այո, հավատում եմ, հավատում եմ, որ Ձեզանից յուրաքանչյուրը անկեղծ մղումով աշխատում է հանուն մեր բոլորի սիրելի կենդանաբանական այգու զարգացման ու զաղկման: Այո, հավատում եմ, որ Ձեր բոլորի եռանդն ու ավյունը տալիս և դեռ տալու է օգտակար պտուղները: Պետք է հավատալ ու քաջալերել մարդուն, որպեսզի նա ինքն էլ ավելի վստահ լինի իր ուժերին, ինքն էլ ավելի հավատա իրեն և նոր եռանդով ու ոգևորությամբ, նոր թափով ու էներգիայով տրվի գործին: Շատ կարևորում եմ այն ամենը, ինչ անում եք այգու համար, շարունակեք նույն ոգով: Իմ հարգանքն ու ողջույնն եմ փոխանցում այգու ամբողջ աշխատակազմին:
Ձեր լավ բարեկամ, Առլեն
Menq el dzez enq shat havatum, ev urakh enq, vor dzer pes anshahakhndir barekam unenq mer koxqin. Dzez maxtum em mec arajyntacner ev verelqner dzer stexcagorcakan kyanqum.
Թերեզա ջան անչափ զգացված եմ այս շոյիչ ու ջերմ խոսքերից: Ուրախ եմ, որ իմ համեստ լուման եմ ներբերում Երևանի կենդանաբանական այգու գործունեության լուսաբանման հարցում: Ես շատ գնահատում եմ Ձեր բոլորի անկեղծ, ջերմ ու բարեկամական արձագանքը և վերաբերմունքը: Կրկին անգամ շնորհակալություն:
Հարգանքով`
Առլեն
Արլեն ջան, իսկ եթե գրքիդ շնորհանդեսը այգում կազմակերպվի…կարծում եմ հրաշալի միջավայր կլինի:
Կներես Առլեն ջան…. մենք այնքան լավ ենք քեզ վերաբերվում, որ նույնիսկ անունդ եմ փաղաքշական «ր»-ով գրում
Շատ շնորհակալ եմ Ձեզ Մանե ջան առաջարկի համար: Ես շատ գնահատում եմ Ձեր բոլորի վերաբերմունքը: Ասեմ, որ գրքի վերաբերյալ անակնկալներ լինելու են նաև բլոգում:
Փոխադարձ հարգանքով`
Առլեն